لیژنەی دارایی پێشوازی لە شاندێكی بانکی جیهانی دەكات
لیژنەی دارایی پەرلەمانی عێراق بەسەرۆکایەتی په‌رله‌مانتار عەتوان عەتوانی و بەئامادەبوونی جێگری یەکەمی سەرۆکی لیژنە په‌رله‌مانتار ئه‌حمه‌د مەزهەر، ڕۆژی یەکشەممە 5/ 2 / 2023، پێشوازیكرد لە بەڕێز ریچارد عه‌بدولنور، جێنس کریستنسن، وینستۆن کولی و سەلام مەعروف، بۆ تاوتوێكردنی ئامادەکردنی یاسای بودجەی گشتی بۆ ساڵی 2023 و پاڵپشتیکردنی پڕۆژەکان لە ڕێگەی دابینکردنی ئاسانکاری بۆ پێدانی قەرز بۆ جێبەجێکردنی پڕۆژەکان.
لە سەرەتای کۆبوونەوەکەدا، لیژنەی دارایی بەخێرهاتنی شاندەکەیان کردو خۆشحاڵیی خۆیان بە سەرکەوتنی هاوکاری هاوبەش دەربڕی و جەختی لەسەر پێویستی پەیوەندی نێوان هەردوولا كرده‌وه‌و پەرۆشیی خۆی پێشاندا بۆ خێراکردنی ئاڵوگۆڕی ڕاوێژی دارایی بۆ تێپەڕاندنی ئاستەنگەکانی بەردەم تیمی ئامادەکاری بودجە.
لیژنە ئەوەشی خستەڕوو کە سورە لەسەر ئەوەی کە بازدانێکی کوالیتی لەو بوارەدا ئەنجام بدرێت و سەرجەم پڕۆژەکان بەپێی دیدێکی هاوبەش و پێویستی ئامادەکردنی خوێندنەوەیەكی گشتگیر لەسەر ئامادەکردنی بودجەو ئەمەش بە كردنەوەی وۆرکشۆپ و ئامادەکاری بۆ بودجەی داهاتوو.
له‌لایه‌ن خۆیه‌وه شاندی بانکی جیهانی سوپاسی ئەو پێشوازییە گەرمەیان کردو جەختیان لەسەر گرنگی کارکردن لەگەڵ لیژنەی پەرلەمان و مامەڵەکردن لەگەڵ لایەنە یاسادانانەکان کرده‌وه بۆ دابینکردنی پشتیوانی و ئاسانکاری بۆ ئەو ڕێوشوێنانەی كه پەیڕەو دەکرێن لە جێبەجێکردنی پڕۆژەکان و پێویستی پشتیوانی هاوبەش لەهەموو سێکتەرەکانداو ئامادەیی خۆی دەربڕی بۆ پشتیوانی كردنی تواناسازی پەرلەمانتاران و ستاف و بەڕێوەبردنی پڕۆژەکان لەڕێگەی كردنەوەی وۆرکشۆپ.
لەلایەکی ترەوە لیژنەی دارایی لەگەڵ شاندی میوان گفتوگۆی چۆنیه‌تی برەوپێدانی یاسای پاراستنی کۆمەڵایەتی و خانەنشینی کرێکاران كرد.
فەرمانگەی راگەیاندن
٢٠٢٣/٢/٥