شاندی سعودی لە گەڵ سەرۆکی دەستەی وەبەرهێنان تاوتوێی‌ یاسای پاراستنی وەبەرهێنەر دەکات

شاندی ئەنجومەنی شورای‌ سعودیە بە سەرۆکایەتی ئیبراهیم کوڕی محەمەد قەناس سەرۆکی لیژنەی دۆستایەتیی سعودی ــ عێراقی، بە یاوەری شێخ شەعلان کەریم سەرۆکی لیژنەی دۆستایەتیی عێراقی – سعودی، ڕۆژی یەکشەممە، بە ئامادەبوونی باڵیۆزی سعودیە لە بەغدا عەبدولعەزیز شەمەری، چاویكه‌وت بە دکتۆر حەیدەر مەکیە سەرۆکی دەستەی وەبەرهێنان لە عێراق له‌ باره‌گای‌ ده‌سته‌كه‌ له‌ شاری‌ به‌غدا.
شێخ شەعلان کەریم ئاماژەیدا کە دەستەکە گرنگیەکی گەورەی هەیە لە ئایندەی وەبەرهێنان لە عێراقدا، چونکە پڕۆژەکان لەوەوە دەستپێدەکەن و هەلی وەبەرهێنانی گەورەی هەیە لە دروستکردنی پڕۆژە ستراتیژیەکاندا، گووتیشی کە سعودیە ئەو توانایانەی هەیە کە دۆخی‌ پڕۆژەكانی‌ عێراق ڕاپەڕێنێت لە سایەی بوونی کۆمپانیا گەورەکانیەوە.
دکتۆر حەیدەر مەکیە به‌خێرهاتنی شاندی شورای‌ سعودێە کردو داوایكرد شاندەکە ئاماده‌ی‌ کۆنگرەکەی سەرۆکی ئه‌نجومه‌نی‌ وەزیران ببێت، کە لە٣٠ـ٣١/١٠ ده‌به‌سترێت، ئاماژەشیدا کە پڕۆژەو بەرهێنانەکانی تێدایە لە هه‌موو بوارەكانی‌ ئابووری و نیشتەجێكردن و کشتوکاڵی و بواری وزە و هیوای‌ خواست کە لەوێدا دەرئەنجامی‌ باش هەبێت لە میانی سەردانەکان و چاوپێکەوتنەکاندا.
لەلای خۆیەوە سەرۆکی لیژنەی پەیوەندیەکانی سعودی ـ عێراقی جەختیکردەوە کە هەوڵی‌ گەورە دراوە بۆ ئاسانکردنی ڕێکارەکانی وەبەرهێنان و هێنانی خاوەنکارەکان لە میانی یاسای وەبەرهێناندا، گووتیشی کە عێراق ناوچەیەکی ڕاکێشەرە بۆ کارەکان و گۆڕانکاریەکی ئاشکرا بەخۆیەوە دەبینێت، سەرەڕای تاوتوێکردنی‌ هاوکاری لە نێوان عێراق و سعودیەدا.

 

ئەنجومەنی وێنەران
فەرمانگەی ڕاگەیاندن
١٠/٩/٢٠٢٣